തിരുവനന്തപുരം: പുതുവത്സര വിപണിയില് ഭക്ഷ്യ സുരക്ഷാ വകുപ്പ് 1340 പ്രത്യേക പരിശോധനകള് നടത്തിയതായി ആരോഗ്യ വകുപ്പ് മന്ത്രി വീണാ ജോര്ജ്. ക്രിസ്തുമസിനോടനുബന്ധിച്ച് സംസ്ഥാന വ്യാപകമായി 252 സ്ക്വാഡുകളുടെ നേതൃത്വത്തില് നടത്തിയ 2861 പരിശോധനകള് കൂടാതെയാണിത്. 109 പ്രത്യേക സ്ക്വാഡുകളാണ് പുതുവത്സര വിപണിയില് പരിശോധനകള് നടത്തിയത്. മാനദണ്ഡങ്ങള് പാലിക്കാത്ത 21 സ്ഥാപനങ്ങളുടെ പ്രവര്ത്തനം നിര്ത്തിവയ്പ്പിച്ചതായി മന്ത്രി അറിയിച്ചു.182 സ്ഥാപനങ്ങള്ക്ക് റെക്ടിഫിക്കേഷന് നോട്ടീസും 109 കോമ്പൗണ്ടിംഗ് നോട്ടീസും നല്കിയിട്ടുണ്ട്. 39 സ്റ്റ്യാറ്റിയൂട്ടറി സാമ്പിളുകളും 284 സര്വൈലന്സ് സാമ്പിളുകളും പരിശോധനയ്ക്കായി ശേഖരിച്ചു. ഭക്ഷ്യ സുരക്ഷാ പരിശോധനകള് കര്ശനമായി തുടരുമെന്നും മന്ത്രി വ്യക്തമാക്കി. പുതുവത്സര വിപണിയില് കൂടുതല് വിറ്റഴിക്കുന്ന ഭക്ഷ്യ വസ്തുക്കളുടെ ഗുണനിലവാരം ഉറപ്പാക്കാന് ശക്തമായ പരിശോധനകളാണ് നടത്തിയത്. കേക്ക്, വൈന്, മറ്റുള്ള ബേക്കറി വസ്തുക്കള് നിര്മ്മിക്കുന്ന ബോര്മകള്, ബേക്കറി, മറ്റ് ചെറുകിട സംരംഭങ്ങള് എന്നിവിടങ്ങളില് പ്രത്യേക പരിശോധനകള് നടത്തി. കേക്ക്, കേക്ക് നിര്മ്മാണത്തിന് ഉപയോഗിക്കുന്ന വിവിധ അസംസ്കൃത വസ്തുക്കള്, ഐസ്ക്രീം, ശര്ക്കര, വെളിച്ചെണ്ണ തുടങ്ങിയവ പരിശോധനയ്ക്ക് വിധേയമാക്കി
പശ്ചിമേഷ്യയിൽ സമാധാനത്തിനും സുരക്ഷയ്ക്കും ഇന്ത്യ-യുഎഇ സഹകരണം
September 19, 2026
No Comments
