മലയാളത്തിലെ അപ്കമിംഗ് റിലീസുകളില് പ്രേക്ഷകര് ഏറെ കാത്തിരിക്കുന്ന ഒന്നാണ് തുടരും. തരുണ് മൂര്ത്തിയുടെ സംവിധാനത്തില് മോഹന്ലാല് നായകനാവുന്ന ചിത്രമാണിത്. മുണ്ടുടുത്ത് ഒരു സാധാരണക്കാരനായി മോഹന്ലാല് വീണ്ടും എത്തുന്ന ചിത്രം എന്നതാണ് ഏറ്റവും വലിയ പ്രത്യേകത. ശോഭനയാണ് ചിത്രത്തിലെ നായിക. 15 വര്ഷത്തിന് ശേഷം മോഹന്ലാല്- ശോഭന കോമ്പോ ഒരുമിക്കുന്നു എന്ന പ്രത്യേകതയുമുണ്ട്. പോസ്റ്റ് പ്രൊഡക്ഷന് പുരോഗമിക്കുന്ന ചിത്രത്തിന്റെ പുതിയൊരു പോസ്റ്റര് പുറത്തുവിട്ടിരിക്കുകയാണ് ഇപ്പോള് അണിയറക്കാര്.
ഷണ്മുഖം എന്ന ടാക്സി ഡ്രൈവറായാണ് മോഹന്ലാല് ചിത്രത്തില് എത്തുന്നത്. മറ്റ് ഡ്രൈവര് സുഹൃത്തുക്കള്ക്കൊപ്പം ടാക്സി സ്റ്റാന്ഡില് നില്ക്കുന്ന ഷണ്മുഖമാണ് പുറത്തെത്തിയ പോസ്റ്ററില്. പത്രം വായിക്കുന്നതിനിടെ എന്തോ കമന്റ് പറഞ്ഞ് നില്ക്കുകയാണ് ഷണ്മുഖം. മുഖത്ത് ചിരിയുമുണ്ട്. ആരാധകരുടെ വലിയ സ്വീകരണമാണ് പോസ്റ്ററിന് സോഷ്യല് മീഡിയയില് ലഭിക്കുന്നത്. കെ ആര് സുനിലിന്റെ കഥയ്ക്ക് തരുണ് മൂര്ത്തിയും കെ ആര് സുനിലും ചേര്ന്നാണ് തിരക്കഥ ഒരുക്കിയിരിക്കുന്നത്.പല ഷെഡ്യൂളുകളായി നടന്ന 99 ദിവസത്തെ ചിത്രീകരണമാണ് സിനിമയ്ക്കായി നടന്നത്. രജപുത്രയുടെ ബാനറിൽ എം രഞ്ജിത്ത് ആണ് നിര്മ്മാണം. ബിനു പപ്പു, ഫർഹാൻ ഫാസിൽ, മണിയൻപിള്ള രാജു എന്നിവര്ക്കൊപ്പം നിരവധി പുതുമുഖങ്ങളും ചിത്രത്തില് അഭിനയിക്കുന്നു. ഷാജി കുമാര് ആണ് ഛായാഗ്രഹണം. എഡിറ്റിംഗ് നിഷാദ് യൂസുഫ്, ഷെഫീഖ് വി ബി, സംഗീതം ജേക്സ് ബിജോയ്, എക്സിക്യൂട്ടീവ് പ്രൊഡ്യൂസര് അവന്തിക രഞ്ജിത്ത്, ശബ്ദ സംവിധാനം വിഷ്ണു ഗോവിന്ദ്, കലാസംവിധാനം ഗോകുല് ദാസ്, വസ്ത്രാലങ്കാരം സമീറ സനീഷ്, മേക്കപ്പ് പട്ടണം റഷീദ്, നിര്മ്മാണ നിയന്ത്രണം ഡിക്സണ് പൊടുത്താസ്, കോ ഡയറക്ടര് ബിനു പപ്പു.
