തിരുവമ്പാടി സ്വദേശിനിയായ പതിനാലുകാരിയെ കാണാതായ സംഭവത്തിൽ സഹോദരനുമായി സൗഹൃദത്തിലായിരുന്ന ഇടുക്കി സ്വദേശിയായ യുവാവ് അറസ്റ്റിൽ. പെരുമേട് സ്വദേശി അജയ് (24) ആണ് അറസ്റ്റിലായത്. പെണ്കുട്ടിയെ കോയമ്പത്തൂര് റെയില്വേ സ്റ്റേഷനില് നിന്ന് കണ്ടെത്തിയിരുന്നു. ഇതിന് പിന്നാലെയാണ് യുവാവിനെ മുക്കം പൊലീസ് കസ്റ്റഡിയില് എടുത്തത്. ഏഴാം ക്ലാസ് വിദ്യാര്ത്ഥിനിയായ പെണ്കുട്ടിയെ ഇയാള് പ്രണയം നടിച്ച് തട്ടിക്കൊണ്ടുപോവുകയായിരുന്നു എന്നാണ് പൊലീസിന്റെ നിഗമനം.
അറസ്റ്റിലായ അജയ് നിരവധി മോഷണക്കേസുകളിൽ പ്രതിയാണെന്ന് പോലീസ് ഉദ്യോഗസ്ഥർ പറഞ്ഞു. ഒരാഴ്ച മുന്പ് ഡാന്സ് ക്ലാസിലേക്ക് എന്ന് പറഞ്ഞ് വീട്ടില് നിന്നിറങ്ങിയ പെണ്കുട്ടിയെ പിന്നീട് കാണാതാവുകയായിരുന്നു. വീട്ടില് ഉപയോഗിച്ചിരുന്ന ഫോണുമായാണ് പതിനാലുകാരി വീടുവിട്ടിറങ്ങിയത്. വസ്ത്രങ്ങളോ പണമോ എടുത്തിരുന്നില്ലെന്നാണ് ലഭിക്കുന്ന വിവരം. കുട്ടിയുടെ സഹോദരന്റെ സുഹൃത്തുമൊന്നിച്ച് പോയിരിക്കാം എന്ന് ബന്ധുക്കള് സംശയം പ്രകടിപ്പിച്ചതിനെ തുടര്ന്ന് പൊലീസ് ആ വഴിക്കും അന്വേഷിച്ചു.
