ഇന്ത്യയിൽ 5.5 ലക്ഷം 5ജി ബേസ് സ്റ്റേഷനുകൾ; എല്ലാ ജില്ലകളിലും 5ജി സേവനം, ഡിജിറ്റൽ മുന്നേറ്റം ചൂണ്ടിക്കാട്ടി മോദി

ന്യൂഡൽഹി: രാജ്യത്തെ ഡിജിറ്റൽ കണക്റ്റിവിറ്റിയിലും ടെലികോം മേഖലയിലും ഉണ്ടായ മുന്നേറ്റങ്ങൾ ചൂണ്ടിക്കാട്ടി പ്രധാനമന്ത്രി നരേന്ദ്ര മോദി. ഇന്ത്യ മൊബൈൽ കോൺഗ്രസിന്റെ പത്താം പതിപ്പ് ഉദ്ഘാടനം ചെയ്ത് സംസാരിക്കവെ, രാജ്യത്ത് നിലവിൽ 5.5 ലക്ഷത്തിലധികം 5ജി ബേസ് സ്റ്റേഷനുകൾ പ്രവർത്തിക്കുന്നുണ്ടെന്നും എല്ലാ ജില്ലകളിലും 5ജി സേവനം എത്തിയിട്ടുണ്ടെന്നും അദ്ദേഹം വ്യക്തമാക്കി. 2022-ൽ ആരംഭിച്ച 5ജി സേവനം രാജ്യത്തിന്റെ വിവിധ ഭാഗങ്ങളിലേക്ക് വ്യാപിപ്പിക്കാൻ കഴിഞ്ഞത് വലിയ നേട്ടമാണെന്നും അദ്ദേഹം പറഞ്ഞു. കോവിഡ് കാലത്ത് ഓൺലൈൻ വിദ്യാഭ്യാസം, റിമോട്ട് വർക്ക്, കുടുംബങ്ങൾ തമ്മിലുള്ള ആശയവിനിമയം എന്നിവ സുഗമമാക്കുന്നതിൽ ഡിജിറ്റൽ കണക്റ്റിവിറ്റി നിർണായക പങ്കുവഹിച്ചു. പി.എം.-കിസാൻ സമ്മാൻ നിധി ഉൾപ്പെടെയുള്ള സർക്കാർ പദ്ധതികളുടെ ആനുകൂല്യങ്ങൾ ഗുണഭോക്താക്കളുടെ ബാങ്ക് അക്കൗണ്ടുകളിലേക്ക് നേരിട്ട് എത്തിക്കുന്നതിനും മൊബൈൽ സാങ്കേതികവിദ്യ സഹായിക്കുന്നുണ്ടെന്ന് പ്രധാനമന്ത്രി ചൂണ്ടിക്കാട്ടി. വിദൂര പ്രദേശങ്ങളിൽ കൂടുതൽ മൊബൈൽ ടവറുകൾ സ്ഥാപിക്കുക, ഫൈബർ നെറ്റ്‌വർക്ക് വികസിപ്പിക്കുക, കുറഞ്ഞ ചെലവിൽ മൊബൈൽ ഡാറ്റ ലഭ്യമാക്കുക എന്നിവയ്ക്കുള്ള നടപടികൾ തുടരുമെന്നും അദ്ദേഹം വ്യക്തമാക്കി. 2026 ഒക്ടോബർ 7 മുതൽ 10 വരെ ന്യൂഡൽഹിയിലെ യശോഭൂമിയിൽ നടക്കുന്ന ഇന്ത്യ മൊബൈൽ കോൺഗ്രസിന്റെ പ്രമേയം ‘സ്‌കെയിൽ വിത്തൗട്ട് ബൗണ്ടറീസ്’ എന്നതാണ്. 5ജി, 6ജി, നിർമിതബുദ്ധി (എഐ), സെമികണ്ടക്ടർ, സൈബർ സുരക്ഷ, ക്വാണ്ടം കമ്മ്യൂണിക്കേഷൻ തുടങ്ങിയ നൂതന സാങ്കേതികവിദ്യകൾക്കാണ് ഇത്തവണ സമ്മേളനം പ്രധാന്യം നൽകുന്നത്.