രാഷ്ട്രപതി പദവിക്ക് ശേഷവും രാജ്യസേവനം; രാം നാഥ് കോവിന്ദിനെ പ്രശംസിച്ച് പ്രധാനമന്ത്രി മോദി

മുൻ രാഷ്ട്രപതി രാം നാഥ് കോവിന്ദിന്റെ ആത്മകഥയുടെ പ്രകാശനച്ചടങ്ങിൽ പ്രധാനമന്ത്രി നരേന്ദ്ര മോദി അദ്ദേഹത്തിന്റെ പൊതുജീവിതത്തെയും രാജ്യസേവനത്തോടുള്ള പ്രതിബദ്ധതയെയും പ്രശംസിച്ചു. മൊറാർജി ദേശായിയുമായുള്ള പ്രവർത്തനങ്ങൾ കോവിന്ദിന്റെ പൊതുപ്രവർത്തനത്തിലും രാജ്യസേവനത്തിലും വലിയ സ്വാധീനം ചെലുത്തിയതായി മോദി പറഞ്ഞു. പാർലമെന്റ് അംഗം, ഗവർണർ, രാഷ്ട്രപതി എന്നീ വിവിധ ഉത്തരവാദിത്തങ്ങൾ വഹിച്ചപ്പോഴും അദ്ദേഹം കടമയോടും സേവനമനോഭാവത്തോടും പുലർത്തിയ പ്രതിബദ്ധത മാതൃകാപരമായിരുന്നുവെന്നും പ്രധാനമന്ത്രി ചൂണ്ടിക്കാട്ടി.രാഷ്ട്രപതി പദവിയിൽ നിന്ന് വിരമിച്ച ശേഷവും കോവിന്ദ് രാജ്യസേവനത്തിൽ സജീവമായി തുടരുകയാണ്. ‘ഒറ്റ രാജ്യം, ഒറ്റ തെരഞ്ഞെടുപ്പ്’ വിഷയത്തിൽ അദ്ദേഹം നടത്തുന്ന പ്രവർത്തനങ്ങൾ ഇന്ത്യൻ ജനാധിപത്യത്തിന് പുതിയൊരു അധ്യായം തുറക്കാൻ സഹായിക്കുമെന്നും മോദി പറഞ്ഞു. കോവിന്ദിന്റെ സേവനമനോഭാവം രാജ്യത്തെ ജനങ്ങൾക്ക് വലിയ പ്രചോദനമാണെന്നും അദ്ദേഹത്തിന്റെ ജീവിതത്തിൽ നിന്ന് ഏറെ പഠിക്കാനുണ്ടെന്നും പ്രധാനമന്ത്രി വ്യക്തമാക്കി.