അതിർത്തികളിൽ റെയിൽവേ വിപ്ലവം; 5 ബില്യൺ ഡോളർ നിക്ഷേപത്തിന് ഇന്ത്യ

ചൈന, പാകിസ്ഥാൻ, ബംഗ്ലാദേശ് അതിർത്തികളിലെ റെയിൽവേ അടിസ്ഥാന സൗകര്യങ്ങൾ ശക്തിപ്പെടുത്തുന്നതിനായി ഇന്ത്യ അഞ്ച് ബില്യൺ ഡോളർ നിക്ഷേപിക്കാൻ ഒരുങ്ങുന്നു. അടുത്ത ഒന്നര മുതൽ രണ്ട് വർഷത്തിനുള്ളിൽ നടപ്പാക്കാൻ ലക്ഷ്യമിടുന്ന പദ്ധതിയുടെ ഭാഗമായി പഞ്ചാബ്, പശ്ചിമ ബംഗാൾ, ഹിമാചൽ പ്രദേശ്, രാജസ്ഥാൻ, അസം, വടക്കുകിഴക്കൻ സംസ്ഥാനങ്ങൾ എന്നിവിടങ്ങളിൽ പുതിയ റെയിൽപാതകളും പ്ലാറ്റ്ഫോമുകളും നിർമ്മിക്കും. രാജ്യത്തെ മൊത്തം റെയിൽവേ വികസന പദ്ധതികളുടെ 22 ശതമാനവും അതിർത്തി മേഖലകൾക്കായി മാറ്റിവെക്കുമെന്നാണ് റിപ്പോർട്ടുകൾ. സിവിലിയൻ ഗതാഗതത്തിനും സൈനിക ആവശ്യങ്ങൾക്കും ഒരുപോലെ ഉപയോഗിക്കാവുന്ന ഡ്യുവൽ-യൂസ് അടിസ്ഥാന സൗകര്യങ്ങൾ സൃഷ്ടിക്കുന്നതിലൂടെ അതിർത്തി പ്രദേശങ്ങളിലെ സൈനിക വിന്യാസവും ചരക്ക് ഗതാഗതവും കൂടുതൽ വേഗത്തിലും കാര്യക്ഷമമായും നടത്താൻ ഈ പദ്ധതി സഹായിക്കും.