മൈനാഗപ്പള്ളിയിൽ സ്കൂട്ടർ യാത്രക്കാരൻ കാറിടിച്ച് മരിച്ച സംഭവത്തിൽ മോട്ടോർ വാഹന വകുപ്പ് നടപടി സ്വീകരിച്ചു. വാഹനമോടിച്ച പ്രതി അജ്മലിൻ്റെ ഡ്രൈവിംഗ് ലൈസൻസ് റദ്ദാക്കുമെന്ന് മോട്ടോർ വാഹന വകുപ്പ് അറിയിച്ചു. ഇതിന് ശേഷം ആവശ്യമായ കൂടുതൽ നടപടികൾ സ്വീകരിക്കുമെന്നും അധികൃതർ അറിയിച്ചു. ഇപ്പോഴിതാ സംഭവത്തിൽ നിർണായകമായ പുതിയ സിസിടിവി ദൃശ്യങ്ങൾ പുറത്തുവന്നിരിക്കുകയാണ്. അപകടമുണ്ടാക്കിയശേഷം പ്രതികളായ അജ്മലും ഡോ. ശ്രീക്കുട്ടിയും കാറിൽ അമിതവേഗതയിൽ പോകുന്നതും കാറിനെ നാട്ടുകാര് ബൈക്കില് പിന്തുടര്ന്ന് തടയുന്നതിന്റെയും ദൃശ്യങ്ങള് ലഭിച്ചു.
നിര്ത്താതെ പോയ കാറിനെ നാട്ടുകാര് ബൈക്കില് പിന്തുടരുകയായിരുന്നു. തുടര്ന്ന് അമിതവേഗത്തിൽ പാഞ്ഞ കാര് റോഡ് സൈഡിൽ നിയന്ത്രണം വിട്ടാണ് നിന്നത്. ഇതിനിടയിൽ ബൈക്കിലെത്തിയ യുവാക്കള് കാര് തടഞ്ഞു. യുവാക്കള് കാറിന്റെ ഡോര് തുറന്ന് പ്രതിയായ അജ്മലിനെ പുറത്തിറക്കി. നാട്ടുകാര് തടഞ്ഞുവെച്ചെങ്കിലും പ്രതി ഓടി രക്ഷപ്പെടുകയായിരുന്നു. അജ്മലിന് പുറകെ ശ്രീകുട്ടിയും നടന്നുപോകുന്നത് ദൃശ്യത്തിലുണ്ട്.
