കരിങ്കടലിൽ 23 ഇന്ത്യക്കാരുമായി പോയ എണ്ണക്കപ്പലിന് ഡ്രോൺ ആക്രമണം; ജീവനക്കാരെ രക്ഷപ്പെടുത്തി

മോസ്കോ: റഷ്യയുടെ കരിങ്കടൽ തീരത്ത് 23 ഇന്ത്യൻ ജീവനക്കാരുമായി സഞ്ചരിച്ച ലൈബീരിയൻ പതാകയുള്ള എണ്ണക്കപ്പലിന് ഉക്രേനിയൻ ഡ്രോൺ ആക്രമണമുണ്ടായതായി റഷ്യൻ അധികൃതർ. ആക്രമണത്തെ തുടർന്ന് ‘അഫ്രാമാക്സ് റിയോ’ എന്ന ടാങ്കറിൽ തീപിടിച്ചെങ്കിലും കപ്പലിലുണ്ടായിരുന്ന മുഴുവൻ 23 ജീവനക്കാരെയും രക്ഷപ്പെടുത്തിയതായി റഷ്യൻ ഗതാഗത മന്ത്രാലയം അറിയിച്ചു.സോച്ചിക്ക് സമീപം കരിങ്കടലിൽ ചൊവ്വാഴ്ചയാണ് ടാങ്കറിന് നേരെ നാവിക ഡ്രോണുകളുടെ ആക്രമണമുണ്ടായതെന്നാണ് റഷ്യയുടെ വിശദീകരണം. ആക്രമണത്തെ തുടർന്ന് ക്രൂഡ് ഓയിൽ കടലിൽ തുറന്ന നിലയിൽ കത്തുന്ന സാഹചര്യമുണ്ടായി. തീപിടിത്തത്തിൽ ജീവനക്കാർക്ക് പരിക്കേറ്റിട്ടില്ലെന്നും അധികൃതർ അറിയിച്ചു.തീപിടിത്തത്തിന്റെ തീവ്രത കാരണം തുടക്കത്തിൽ അഗ്നിശമന പ്രവർത്തനങ്ങൾ ബുദ്ധിമുട്ടിലായെങ്കിലും പിന്നീട് തീയുടെ ശക്തി കുറഞ്ഞതോടെ നിയന്ത്രണ നടപടികൾ സ്വീകരിച്ചതായി റഷ്യൻ ഗതാഗത മന്ത്രാലയം വ്യക്തമാക്കി. കപ്പലിലെ മുഴുവൻ ജീവനക്കാരും ഇന്ത്യൻ പൗരന്മാരാണെന്നും റിപ്പോർട്ടുകൾ വ്യക്തമാക്കുന്നു.സംഭവത്തെ തുടർന്ന് സിറിയസ് ഫെഡറൽ ടെറിട്ടറിയിലെ കടൽത്തീരങ്ങൾ അധികൃതർ അടച്ചു. വായുവിന്റെയും വെള്ളത്തിന്റെയും ഗുണനിലവാരം നിരീക്ഷിച്ചുവരികയാണ്. നിലവിൽ മലിനീകരണത്തിന്റെ തോത് ആരോഗ്യത്തിന് ഭീഷണിയാകുന്ന നിലയിലല്ലെന്നാണ് അധികൃതരുടെ വിലയിരുത്തൽ.2022-ൽ റഷ്യ-ഉക്രെയ്ൻ യുദ്ധം ആരംഭിച്ചതിന് ശേഷം കരിങ്കടലിലെ വാണിജ്യ കപ്പൽ ഗതാഗതത്തിന് നേരെ നിരവധി ആക്രമണങ്ങൾ ഉണ്ടായിട്ടുണ്ട്. ചൊവ്വാഴ്ച തന്നെ മറ്റൊരു വ്യാപാര കപ്പലിന് നേരെയുണ്ടായ റഷ്യൻ ആക്രമണത്തിൽ ഒരാൾ കൊല്ലപ്പെടുകയും നിരവധി പേർക്ക് പരിക്കേൽക്കുകയും ചെയ്തതായി റിപ്പോർട്ടുകളുണ്ട്.