GDP വളർച്ച 7.8%; പ്രതീക്ഷകൾ മറികടന്ന് ഇന്ത്യൻ സമ്പദ്‌വ്യവസ്ഥ

ന്യൂഡൽഹി: പശ്ചിമേഷ്യൻ സംഘർഷങ്ങളും ആഗോള സാമ്പത്തിക വെല്ലുവിളികളും നിലനിൽക്കുന്നതിനിടെ, നടപ്പ് സാമ്പത്തിക വർഷത്തിന്റെ ആദ്യ പാദത്തിൽ ഇന്ത്യയുടെ ജി.ഡി.പി വളർച്ച 7.8 ശതമാനമായി. റിസർവ് ബാങ്ക് ഓഫ് ഇന്ത്യയുടെ 7 ശതമാനം വളർച്ചാ പ്രവചനത്തെയും മറികടന്നാണ് സമ്പദ്‌വ്യവസ്ഥ മികച്ച പ്രകടനം കാഴ്ചവച്ചത്.ഏപ്രിൽ–ജൂൺ കാലയളവിൽ നിർമ്മാണ, സേവന മേഖലകളാണ് സാമ്പത്തിക വളർച്ചയ്ക്ക് പ്രധാന പിന്തുണ നൽകിയത്. നിർമ്മാണ മേഖല 9.2 ശതമാനവും സേവന മേഖല 10 ശതമാനവും വളർച്ച രേഖപ്പെടുത്തി. കൃഷി ഉൾപ്പെടെയുള്ള പ്രധാന മേഖലകളിലും മികച്ച പ്രകടനം ഉണ്ടായതായി വിലയിരുത്തപ്പെടുന്നു.സർക്കാരിന്റെ സാമ്പത്തിക നയങ്ങളും വിവിധ പരിഷ്കാരങ്ങളും വളർച്ചയ്ക്ക് സഹായകമായെന്ന് പ്രധാനമന്ത്രി നരേന്ദ്ര മോദിയും കേന്ദ്ര ധനമന്ത്രി നിർമല സീതാരാമനും ചൂണ്ടിക്കാട്ടി. അടിസ്ഥാന സൗകര്യ വികസന നിക്ഷേപങ്ങളിലും മൂലധന രൂപീകരണത്തിലും ഉണ്ടായ വർധനയും സമ്പദ്‌വ്യവസ്ഥയുടെ ശക്തമായ അടിത്തറയാണ് സൂചിപ്പിക്കുന്നത്.അതേസമയം, ഉയർന്ന പണപ്പെരുപ്പവും എണ്ണവിലയിലെ വർധനയും വരും മാസങ്ങളിൽ വെല്ലുവിളിയാകാമെന്നാണ് സാമ്പത്തിക വിദഗ്ധരുടെ മുന്നറിയിപ്പ്. പണപ്പെരുപ്പ സമ്മർദം ശക്തമായാൽ റിസർവ് ബാങ്ക് പലിശനിരക്ക് ഉയർത്താനുള്ള സാധ്യതയും നിലനിൽക്കുന്നുണ്ട്.പശ്ചിമേഷ്യൻ പ്രതിസന്ധികൾക്കിടയിലും കൃഷി, നിർമ്മാണം, സേവനം എന്നീ പ്രധാന മേഖലകളുടെ മികച്ച പ്രകടനമാണ് ഇന്ത്യയുടെ സാമ്പത്തിക വളർച്ചയ്ക്ക് കരുത്തായത് എന്ന് മുഖ്യ സാമ്പത്തിക ഉപദേഷ്ടാവ് വി. അനന്ത നാഗേശ്വരൻ വ്യക്തമാക്കി.