ഇംഗ്ലീഷ്, കൊമേഴ്സ്, സോഷ്യോളജി എന്നീ മൂന്ന് വിഷയങ്ങളിൽ പരീക്ഷ വീണ്ടും നടത്താൻ നാഷണൽ ടെസ്റ്റിംഗ് ഏജൻസി തീരുമാനിച്ചു

യുജിസി നെറ്റ് പരീക്ഷയിലെ ചോദ്യപേപ്പറുകളിൽ നിരവധി പിഴവുകൾ കണ്ടെത്തിയതിനെ തുടർന്ന് ഇംഗ്ലീഷ്, കൊമേഴ്സ്, സോഷ്യോളജി എന്നീ മൂന്ന് വിഷയങ്ങളിൽ പരീക്ഷ വീണ്ടും നടത്താൻ നാഷണൽ ടെസ്റ്റിംഗ് ഏജൻസി തീരുമാനിച്ചു. ജൂൺ 22 മുതൽ 30 വരെ നടന്ന പരീക്ഷകളാണ് പുനഃക്രമീകരിക്കുന്നത്. ചോദ്യപേപ്പറുകളിൽ വസ്തുതാപരമായ പിഴവുകൾ, അച്ചടിപ്പിശകുകൾ, വിവർത്തന-വ്യാകരണ പിശകുകൾ, തെറ്റായ പദപ്രയോഗങ്ങൾ, ചോദ്യങ്ങളുടെ ആവർത്തനം എന്നിവ കണ്ടെത്തിയതായി എൻടിഎ അറിയിച്ചു. പ്രത്യേകിച്ച് ഇംഗ്ലീഷ് പേപ്പറിൽ 2024 ഡിസംബറിലെ പരീക്ഷയിൽ ചോദിച്ച കുറഞ്ഞത് 14 ചോദ്യങ്ങൾ ആവർത്തിച്ചതായും റിപ്പോർട്ടുണ്ട്. പുനഃപരീക്ഷയ്ക്ക് വിദ്യാർഥികളിൽ നിന്ന് അധിക ഫീസ് ഈടാക്കില്ല. പരീക്ഷാ തീയതി, കേന്ദ്രം, നഗര വിവരങ്ങൾ, അഡ്മിറ്റ് കാർഡ് എന്നിവ സംബന്ധിച്ച വിശദാംശങ്ങൾ പിന്നീട് ഔദ്യോഗിക വെബ്സൈറ്റിലൂടെ അറിയിക്കും.