ദോക്ലാം അതിർത്തിക്ക് സമീപം റെയിൽവേ വികസനം; ചൽസ-നക് പദ്ധതി വീണ്ടും ട്രാക്കിൽ

ദോക്ലാം ട്രൈ-ജംഗ്ഷന് സമീപമുള്ള തന്ത്രപ്രധാന ചൽസ-നക് റെയിൽവേ പദ്ധതിക്ക് പുതുജീവൻ ലഭിക്കുകയാണ്. 2011-12ൽ അനുമതി ലഭിച്ച ഈ പദ്ധതി ഭൂമി ഏറ്റെടുക്കലുമായി ബന്ധപ്പെട്ട തടസ്സങ്ങൾ കാരണം 2019 മുതൽ നിലച്ചുകിടക്കുകയായിരുന്നു. ഇപ്പോൾ പശ്ചിമ ബംഗാൾ സർക്കാർ ഭൂമി ഏറ്റെടുക്കൽ നടപടികൾ വേഗത്തിലാക്കിയതോടെ പദ്ധതിയുടെ നടപ്പാക്കൽ വീണ്ടും സജീവമായിരിക്കുകയാണ്. 20 കിലോമീറ്റർ ദൈർഘ്യമുള്ള ഈ റെയിൽപാത ന്യൂ ജൽപായ്ഗുരി-സിലിഗുരി-ന്യൂ ബോംഗൈഗാവ് ഗേജ് കൺവേർഷൻ പദ്ധതിയുടെ ഭാഗമായാണ് വികസിപ്പിക്കുന്നത്.ഇതിനുപുറമെ, ജൽധാക്കയിലേക്കുള്ള 17 കിലോമീറ്റർ പുതിയ റെയിൽപാതയ്ക്കായി റെയിൽവേ മന്ത്രാലയം 272 കോടി രൂപ അനുവദിച്ചിട്ടുണ്ട്. കുന്‍ മോഡിൽ നിന്ന് ആരംഭിച്ച് ജൽപായ്ഗുരി, കലിംപോങ് വനമേഖലകളിലൂടെ കടന്നുപോകുന്ന ഈ പാത ജൽധാക്ക, ബിന്ദു, തോഡ് ടാങ്ത തുടങ്ങിയ പ്രധാന വിനോദസഞ്ചാര കേന്ദ്രങ്ങളിലേക്കുള്ള യാത്ര കൂടുതൽ സുഗമമാക്കും. ഇതിലൂടെ വടക്കൻ ബംഗാളിലെ ടൂറിസം മേഖലയ്ക്കും പ്രാദേശിക സമ്പദ്‌വ്യവസ്ഥയ്ക്കും വലിയ ഉത്തേജനം ലഭിക്കുമെന്നാണ് പ്രതീക്ഷ.പ്രതിരോധപരമായും ഈ പദ്ധതിക്ക് വലിയ പ്രാധാന്യമുണ്ട്. ദോക്ലാം അതിർത്തിക്ക് സമീപമുള്ള റെയിൽ ശൃംഖലയുടെ വികസനം സൈനികരുടെയും അവശ്യവസ്തുക്കളുടെയും വേഗത്തിലുള്ള നീക്കം സാധ്യമാക്കുകയും അടിയന്തര സാഹചര്യങ്ങളിൽ ലോജിസ്റ്റിക് പിന്തുണ ശക്തിപ്പെടുത്തുകയും ചെയ്യും. മൺസൂണിന് ശേഷം റെയിൽവേയും പശ്ചിമ ബംഗാൾ വനം വകുപ്പും ചേർന്ന് സംയുക്ത സർവേ നടത്തി റൂട്ട് അന്തിമമാക്കാനാണ് പദ്ധതി. വർഷങ്ങളായി മുടങ്ങിക്കിടന്ന ഈ പദ്ധതി ഇപ്പോൾ വേഗത്തിൽ യാഥാർഥ്യമാകുമെന്ന പ്രതീക്ഷയിലാണ് പ്രദേശവാസികളും വികസന മേഖലയിലെ വിദഗ്ധരും.