ഒന്നര വർഷമായി ശബരിമല സന്നിധാനത്ത് സൂക്ഷിച്ചിരുന്ന കേടുപാടുകൾ സംഭവിച്ച അരവണ അടുത്ത മാസത്തോടെ പൂർണമായും നീക്കം ചെയ്യുമെന്ന് ദേവസ്വം കമ്മിറ്റി അറിയിച്ചു. b
കേടായ 6,65,127 അരവണ കന്നാസുകളാണ് സന്നിധാനത്ത് കൂട്ടിയിട്ടിരിക്കുന്നത്. പരിസ്ഥിതിക്ക് കോട്ടം തട്ടാതെ ശാസ്ത്രീയമായി നശിപ്പിക്കാൻ കോടതി ഉത്തരവിട്ടെങ്കിലും നടപടികൾ വൈകുകയായിരുന്നു. സെപ്റ്റംബറോടെ കേടായ അരവണ പമ്പ കടക്കുമെന്നാണ് ദേവസ്വം ബോർഡ് പറയുന്നത്. ഒന്നേകാൽ കോടിക്ക് ഏറ്റുമാനൂർ ആസ്ഥാനമായ സ്വകാര്യകമ്പനി കരാർ എടുത്തിട്ടുണ്ട്.
ഏലത്തിൽ കീടനാശിനി അടങ്ങിയിട്ടുണ്ടെന്ന ആരോപണത്തെത്തുടർന്ന് 2023 ജനുവരിയിൽ ഹൈക്കോടതി അരവണ വിൽപ്പന നിരോധിച്ചു. എന്നാൽ, കീടനാശിനിയുടെ സാന്നിധ്യം തെളിയിക്കുന്നതിൽ ഹർജിക്കാരന് പരാജയപ്പെട്ടു. ഹർജി തള്ളി. എന്നാൽ അപ്പോഴേക്കും ആറരക്കോടിയിലധികം രൂപയുടെ അരവണ നശിച്ചുപോയിരുന്നു.
