കുംഭമേള താരവിവാഹം: രാഷ്ട്രീയ–നിയമ കുരുക്കിൽ

തിരുവനന്തപുരത്ത് തിരഞ്ഞെടുപ്പ് മുന്നോടിയായി മന്ത്രി വി. ശിവൻകുട്ടിയുടെ സാന്നിധ്യത്തിൽ നടന്ന വൈറൽ താരത്തിന്റെ വിവാഹം സി.പി.എമ്മിനും പോലീസിനും വലിയ വിവാദമായി മാറി. കുംഭമേളയിലെ വൈറൽ താരത്തിന്റെ ഭർത്താവ് ഫർമാൻ ഖാനെതിരെ മധ്യപ്രദേശ് പോലീസ് പോക്സോ കേസ് രജിസ്റ്റർ ചെയ്തതോടെയാണ് സംഭവം ഗൗരവതരമായത്. ദേശീയ പട്ടികവർഗ കമ്മീഷന്റെ അന്വേഷണത്തിൽ വിവാഹസമയത്ത് പെൺകുട്ടിക്ക് പ്രായപൂർത്തിയായിരുന്നില്ലെന്ന് കണ്ടെത്തി. ഇതിന്റെ അടിസ്ഥാനത്തിൽ കേരള, മധ്യപ്രദേശ് ഡിജിപിമാരോട് ഏപ്രിൽ 22ന് ഡൽഹിയിൽ ഹാജരാകാൻ നിർദേശം നൽകി.വിവാഹത്തിനായി വ്യാജ ജനന സർട്ടിഫിക്കറ്റ് ഉപയോഗിച്ചെന്ന കണ്ടെത്തലും വിവാദം ശക്തമാക്കി. മന്ത്രി ശിവൻകുട്ടിക്കൊപ്പം സി.പി.എം സംസ്ഥാന സെക്രട്ടറി എം.വി. ഗോവിന്ദനും എ.എ. റഹീം എം.പി ഉൾപ്പെടെ നിരവധി നേതാക്കൾ വിവാഹത്തിൽ പങ്കെടുത്തിരുന്നു. “റിയൽ കേരള സ്റ്റോറി” എന്ന് വിശേഷിപ്പിച്ച ഈ വിവാഹം ഇപ്പോൾ നിയമ-രാഷ്ട്രീയ പ്രതിസന്ധിയായി മാറിയിരിക്കുകയാണ്.മാർച്ച് 11ന് കേരളത്തിൽ നടന്ന വിവാഹത്തിൽ പെൺകുട്ടിക്ക് 18 വയസ് തികഞ്ഞുവെന്ന രേഖകൾ കാണിച്ചിരുന്നെങ്കിലും യഥാർത്ഥത്തിൽ 2009 ഡിസംബർ 30നാണ് ജനനം, അങ്ങനെ വിവാഹസമയത്ത് പ്രായം 16 മാത്രമാണെന്ന് അന്വേഷണത്തിൽ വ്യക്തമായി. മുമ്പ് പോലീസ് വിവാഹം നിയമപരമാണെന്ന് വ്യക്തമാക്കിയിരുന്നെങ്കിലും ഇപ്പോൾ കേസ് രജിസ്റ്റർ ചെയ്തതോടെ അവരുടെ നിലപാടും ചോദ്യം ചെയ്യപ്പെടുന്നു.പെൺകുട്ടിയുടെ പിതാവ് പ്രായപൂർത്തിയായിട്ടില്ലെന്ന് പറഞ്ഞ് എതിർത്തെങ്കിലും നടപടി ഉണ്ടായില്ലെന്ന ആരോപണവും ഉയരുന്നു. തമ്പാനൂർ പോലീസ് സ്റ്റേഷനിൽ അഭയം തേടിയതിനു പിന്നാലെയാണ് പൂവാർ അരമനൂർ നൈനാർ ക്ഷേത്രത്തിൽ വിവാഹം നടന്നത്. രേഖകൾ പരിശോധിക്കുമ്പോൾ സംശയം തോന്നിയില്ലെന്നാണ് ക്ഷേത്ര ഭാരവാഹികൾ വിശദീകരിക്കുന്നത്. ഇപ്പോൾ സംഭവത്തിൽ കൂടുതൽ അന്വേഷണം പുരോഗമിക്കുകയാണ്.