ജീവിതത്തിൽ എളുപ്പവഴികൾ തേടുന്നതിന് പകരം സ്വന്തം പരിശ്രമത്തിലൂടെയും കഠിനാധ്വാനത്തിലൂടെയും വിജയം നേടുന്നതാണ് ഉചിതമെന്ന് മോഹൻ ഭാഗത്

ജെൻ സി, ജെൻ ആൽഫ തലമുറകളുമായി നടത്തിയ ആശയവിനിമയത്തിൽ ആർഎസ്എസ് സർസംഘചാലക് മോഹൻ ഭാഗവത് നിരവധി സാമൂഹിക വിഷയങ്ങളിൽ തന്റെ നിലപാടുകൾ പങ്കുവച്ചു. ജനാധിപത്യത്തിൽ സംവാദത്തിനാണ് മുൻഗണന നൽകേണ്ടതെന്നും, വ്യവസ്ഥിതിയിലെ പോരായ്മകൾ പരിഹരിക്കാൻ ആവശ്യമായപ്പോൾ സമരങ്ങളും പ്രക്ഷോഭങ്ങളും ജനാധിപത്യ മാർഗങ്ങളാണെന്നും അദ്ദേഹം പറഞ്ഞു. ഇന്നത്തെ തലമുറ ചോദ്യങ്ങൾ ചോദിക്കുന്നവരായതിനാൽ അവർക്ക് യുക്തിസഹമായ ഉത്തരങ്ങളും സ്നേഹപൂർവമായ സമീപനവുമാണ് ആവശ്യമെന്നും അദ്ദേഹം അഭിപ്രായപ്പെട്ടു. സോഷ്യൽ മീഡിയയിലെ വിവരങ്ങളുടെ സത്യാവസ്ഥ പരിശോധിക്കുകയും സ്വയം അച്ചടക്കം പാലിക്കുകയും വേണമെന്ന് അദ്ദേഹം ഓർമ്മിപ്പിച്ചു. വിദ്യാഭ്യാസം കച്ചവടമാകരുതെന്നും, വിദ്യാഭ്യാസ മേഖലയ്ക്ക് സർക്കാർ ബജറ്റിൽ കൂടുതൽ വിഹിതം നൽകേണ്ടതുണ്ടെന്നും അദ്ദേഹം പറഞ്ഞു. കുടുംബം അടുത്ത തലമുറയെ നല്ല പൗരന്മാരായി വളർത്തുന്നതിലെ പ്രധാന ഘടകമാണെന്നും, സാമൂഹിക പരിഷ്കാരങ്ങൾ നിയമത്തിലൂടെ മാത്രം സാധ്യമാകില്ലെന്നും സമൂഹത്തിന്റെ മനോഭാവത്തിലും മാറ്റം വേണമെന്നും അദ്ദേഹം ചൂണ്ടിക്കാട്ടി. LGBTQ+ വിഭാഗവും സമൂഹത്തിന്റെ ഭാഗമാണെന്നും അവരുടെ അവകാശങ്ങൾ അംഗീകരിക്കുന്ന തരത്തിലുള്ള നിയമപരമായ ക്രമീകരണങ്ങൾ ആവശ്യമാണെന്നും അദ്ദേഹം വ്യക്തമാക്കി. സാമൂഹിക വിവേചനം നിലനിൽക്കുന്നിടത്തോളം സംവരണം ആവശ്യമായി തുടരുമെന്ന നിലപാടും അദ്ദേഹം പങ്കുവച്ചു. യഥാർത്ഥ നേതൃത്വം മറ്റുള്ളവരുടെ മുന്നിൽ നിന്ന് പ്രസംഗിക്കുന്നതിലല്ല, മറിച്ച് സ്വന്തം പ്രവൃത്തികളിലൂടെ മാതൃകയാകുന്നതിലാണെന്നും അദ്ദേഹം പറഞ്ഞു. പരിസ്ഥിതിക്ക് ദോഷം വരാത്ത പുതിയ വികസന മാതൃകയിലേക്ക് മാറേണ്ടതുണ്ടെന്നും അതിന്റെ തുടക്കം ഓരോ വ്യക്തിയുടെയും സ്വന്തം വീട്ടിൽ നിന്നാകണമെന്നും അദ്ദേഹം നിർദ്ദേശിച്ചു. പ്രശ്നങ്ങൾ പരിഹരിക്കാൻ സർക്കാരിനെ മാത്രം ആശ്രയിക്കാതെ വ്യക്തികളും സമൂഹവും മുൻകൈ എടുക്കണമെന്നും, മനുഷ്യർക്കിടയിലെ സ്നേഹവും മാനവികതയും അതിർത്തികൾക്കും രാഷ്ട്രീയത്തിനും അതീതമാണെന്നും അദ്ദേഹം ഓർമ്മിപ്പിച്ചു. ജീവിതത്തിൽ എളുപ്പവഴികൾ തേടുന്നതിന് പകരം സ്വന്തം പരിശ്രമത്തിലൂടെയും കഠിനാധ്വാനത്തിലൂടെയും വിജയം നേടുന്നതാണ് ഉചിതമെന്നും അദ്ദേഹം കൂട്ടിച്ചേർത്തു.