ജാനകിയമ്മ ശാസ്ത്രീയ സംഗീതം പഠിച്ചിട്ടില്ല, ശ്രീകുമാരൻ തമ്പി

വിഖ്യാത ഗായിക എസ്. ജാനകിയുടെ വിയോഗത്തിൽ ഗാനരചയിതാവ് ശ്രീകുമാരൻ തമ്പി അനുശോചനം രേഖപ്പെടുത്തി. ജാനകിയമ്മ തനിക്ക് ജ്യേഷ്ഠസഹോദരിയെപ്പോലെയായിരുന്നുവെന്നും, അവരുടെ വേർപാട് ഇന്ത്യൻ ചലച്ചിത്രസംഗീത ലോകത്തിന് തീരാനഷ്ടമാണെന്നും അദ്ദേഹം പറഞ്ഞു.1966 മുതൽ ആറു പതിറ്റാണ്ടിലേറെ നീണ്ട ആത്മബന്ധമാണ് ഇരുവരും പങ്കിട്ടിരുന്നതെന്ന് ശ്രീകുമാരൻ തമ്പി ഓർത്തെടുത്തു. തന്റെ ആദ്യ ചലച്ചിത്രഗാനമായ *’കാട്ടുമല്ലിക’*യിലെ ‘താമരത്തോണിയിൽ താലോലമാടി’ എന്ന ഗാനം യേശുദാസിനൊപ്പം ആലപിച്ചത് എസ്. ജാനകിയായിരുന്നു എന്നും അദ്ദേഹം പറഞ്ഞു.ശാസ്ത്രീയ സംഗീതത്തിൽ ഔപചാരിക പരിശീലനം ഒന്നുമില്ലാതെയാണ് ജാനകിയമ്മ പതിനായിരക്കണക്കിന് ഗാനങ്ങൾ അനായാസം ആലപിച്ചതെന്നും, സംഗീതസംവിധായകർ പാടിക്കൊടുത്താൽ ഒരുതവണ കേട്ടുമാത്രം അതേ ഭാവത്തിലും സ്വരത്തിലും അതിവിശിഷ്ടമായി പാടാനുള്ള അപൂർവ കഴിവ് അവർക്കുണ്ടായിരുന്നുവെന്നും അദ്ദേഹം അനുസ്മരിച്ചു.”ജാനകിയമ്മ സംഗീതദേവതയുടെ അവതാരമായിരുന്നു. സ്വരങ്ങൾ എഴുതിവെക്കാതെ കേട്ടുപഠിച്ച് അതേപടി പാടാൻ കഴിയുന്ന അതുല്യ പ്രതിഭയായിരുന്നു അവർ. ഇന്ത്യയിൽ അവരോട് ഒപ്പമെത്തുന്ന ഗായകർ വളരെ വിരളമാണ്,” എന്നും ശ്രീകുമാരൻ തമ്പി പറഞ്ഞു.ഒരാഴ്ച മുമ്പുവരെ ഹൈദരാബാദിലെത്തി ജാനകിയമ്മയെ കാണണമെന്ന് ആഗ്രഹിച്ചിരുന്നെങ്കിലും സ്വന്തം അനാരോഗ്യം കാരണം അതിന് സാധിക്കാതിരുന്നതിൽ വലിയ ദുഃഖമുണ്ടെന്നും അദ്ദേഹം കൂട്ടിച്ചേർത്തു.ശ്വാസകോശ സംബന്ധമായ അസുഖത്തെ തുടർന്ന് മൈസൂരുവിലെ ആശുപത്രിയിൽ ചികിത്സയിലിരിക്കെ 88-ാം വയസ്സിലായിരുന്നു എസ്. ജാനകിയുടെ അന്ത്യം. ഇരുപതിലധികം ഇന്ത്യൻ, വിദേശ ഭാഷകളിലായി പതിനായിരക്കണക്കിന് ഗാനങ്ങൾ ആലപിച്ച അവർ ഇന്ത്യൻ സംഗീതലോകത്തെ എക്കാലത്തെയും മഹത്തായ ഗായികമാരിൽ ഒരാളായി എന്നും ഓർമ്മിക്കപ്പെടും.