അയോധ്യ രാമക്ഷേത്ര സംഭാവന മോഷണം: സുപ്രീം കോടതിയുടെ നോട്ടീസ്

അയോധ്യ രാമക്ഷേത്രത്തിലെ സംഭാവനകളിൽ ക്രമക്കേടും മോഷണവും നടന്നെന്ന ആരോപണങ്ങളിൽ സിബിഐ അന്വേഷണം ആവശ്യപ്പെട്ടുള്ള ഹർജിയിൽ സുപ്രീം കോടതി കേന്ദ്ര സർക്കാർ, ഉത്തർപ്രദേശ് സർക്കാർ, ശ്രീരാമ ജന്മഭൂമി തീർഥ ക്ഷേത്ര ട്രസ്റ്റ് എന്നിവയ്ക്ക് നോട്ടീസ് അയച്ചു. ഓഡിറ്റ് ചെയ്ത സാമ്പത്തിക കണക്കുകൾ, ലഭിച്ച സംഭാവനകളുടെ വിശദാംശങ്ങൾ, ഫണ്ടുകളുടെ വിനിയോഗം തുടങ്ങിയ വിവരങ്ങൾ ഔദ്യോഗിക വെബ്‌സൈറ്റിൽ പ്രസിദ്ധീകരിച്ച് ട്രസ്റ്റ് പൂർണ സുതാര്യത ഉറപ്പാക്കണമെന്നും, അതേസമയം ദാതാക്കളുടെ രഹസ്യ വിവരങ്ങൾ ആവശ്യമായിടത്ത് സംരക്ഷിക്കണമെന്നും ഹർജിയിൽ ആവശ്യപ്പെടുന്നു. ട്രസ്റ്റ് രൂപീകരിച്ചതിന് ശേഷം ലഭിച്ച പണവും ഡിജിറ്റൽ പേയ്‌മെന്റുകളും വിദേശ സംഭാവനകളും സ്വർണം, വെള്ളി ഉൾപ്പെടെയുള്ള വിലപിടിപ്പുള്ള വസ്തുക്കളും ഉൾപ്പെടെയുള്ള എല്ലാ സംഭാവനകളുടെയും സമഗ്ര കണക്ക് കോടതിയിൽ സമർപ്പിക്കണമെന്നും ഹർജിക്കാരൻ ആവശ്യപ്പെട്ടു.രാമക്ഷേത്ര സംഭാവനകളുമായി ബന്ധപ്പെട്ട ആരോപണങ്ങളിൽ സുപ്രീം കോടതി മേൽനോട്ടത്തിൽ അന്വേഷണം വേണമെന്നാവശ്യപ്പെട്ട് ഹിന്ദു ധർമ്മ പരിഷത്ത് സമർപ്പിച്ച നാലാമത്തെ ഹർജിയാണിത്. നേരത്തെ ഭാഗിക കോടതി പ്രവൃത്തി ദിവസങ്ങളിൽ ഹർജികൾ അടിയന്തരമായി പരിഗണിക്കണമെന്ന ആവശ്യം സുപ്രീം കോടതി തള്ളിയിരുന്നു. സമാന ആവശ്യം ഉന്നയിച്ച ഹർജികൾ അലഹബാദ് ഹൈക്കോടതിയിലും നൽകിയിരുന്നെങ്കിലും, സുപ്രീം കോടതിയിലും കേസ് നിലനിൽക്കുന്നതിനാൽ സമാന്തര നടപടികൾ ഒഴിവാക്കാൻ ഹൈക്കോടതി അവ പരിഗണിച്ചില്ല. ഇതിനിടെ സംസ്ഥാന സർക്കാർ രൂപീകരിച്ച പ്രത്യേക അന്വേഷണ സംഘത്തിന്റെ അന്വേഷണത്തെ തുടർന്ന് ഉത്തർപ്രദേശ് പോലീസ് എഫ്‌ഐആർ രജിസ്റ്റർ ചെയ്തിട്ടുണ്ടെന്നും നിലവിൽ എട്ട് പേർ കസ്റ്റഡിയിലാണെന്നും റിപ്പോർട്ടുകളുണ്ട്.