ഇന്ത്യ–യുഎസ് തന്ത്രപരമായ പങ്കാളിത്തം ശക്തിപ്പെടുത്താൻ മോദി–വാൻസ് ചർച്ച

യുഎസ് വൈസ് പ്രസിഡന്റ് ജെ.ഡി. വാൻസ് പ്രധാനമന്ത്രി നരേന്ദ്ര മോദിയുമായി ഫോണിൽ സംസാരിച്ച് ഇന്ത്യ–യുഎസ് സമഗ്ര ആഗോള തന്ത്രപരമായ പങ്കാളിത്തം കൂടുതൽ ശക്തിപ്പെടുത്തുന്നതിനുള്ള മാർഗങ്ങൾ ചർച്ച ചെയ്തു. വ്യാപാരം, പ്രതിരോധം, നിർണായകവും ഉയർന്നുവരുന്നതുമായ സാങ്കേതികവിദ്യകൾ, ഊർജസുരക്ഷ, നിർണായക ധാതുക്കൾ തുടങ്ങിയ മേഖലകളിലെ സഹകരണം കൂടുതൽ ആഴത്തിലാക്കാൻ ഇരുനേതാക്കളും ധാരണയിലെത്തി.ഇന്ത്യ–യുഎസ് ബന്ധത്തിലെ പുരോഗതിയും ഉയർന്നതല ഇടപെടലുകളിലെ തുടർച്ചയായ മുന്നേറ്റവും മോദിയും വാൻസും വിലയിരുത്തി. പ്രാദേശികവും ആഗോളവുമായ വിഷയങ്ങളിൽ ഇരുവരും കാഴ്ചപ്പാടുകൾ കൈമാറുകയും ചെയ്തു. ഇടക്കാല ഉഭയകക്ഷി വ്യാപാര കരാറിനായുള്ള ചർച്ചകൾ തുടരുന്നതിനിടെയാണ് ഫോൺ സംഭാഷണം നടന്നത്.വാൻസിനെയും ഭാര്യ ഉഷ വാൻസിനെയും അവരുടെ നാലാമത്തെ കുഞ്ഞിന്റെ ജനനത്തിൽ മോദി അഭിനന്ദിക്കുകയും കുടുംബത്തിന് ആശംസകൾ അറിയിക്കുകയും ചെയ്തു.