ഡല്‍ഹിയില്‍ നിന്നും നേപ്പാളിലേക്ക്, ഇനി വെറും 8 മണിക്കൂർ റോഡ് യാത്ര

സോനൗലി–ഗൊരഖ്പൂർ നാലുവരിപ്പാത യാഥാർഥ്യമാകുന്നതോടെ ഡൽഹിയിൽ നിന്ന് നേപ്പാൾ അതിർത്തിയിലേക്ക് റോഡ് മാർഗം ഏകദേശം എട്ട് മണിക്കൂറിൽ എത്താനാകും. ഏകദേശം 40,000 കോടി രൂപ ചെലവിൽ നിർമിക്കുന്ന രാജ്യത്തെ പ്രധാന അന്താരാഷ്ട്ര ദേശീയപാതാ പദ്ധതികളിലൊന്നാണിത്. ഗൊരഖ്പൂരിനെയും സോനൗലിയെയും ബന്ധിപ്പിക്കുന്ന 80 കിലോമീറ്റർ പാത നിലവിലെ തിരക്കേറിയ രണ്ടുവരിപ്പാതയ്ക്ക് പകരമായാണ് ഒരുങ്ങുന്നത്. 68 കിലോമീറ്റർ സർവീസ് റോഡുകൾ, റെയിൽവേ മേൽപ്പാലം, രണ്ട് ഫ്ലൈഓവറുകൾ, 24 അണ്ടർപാസുകൾ, 105 ചെറിയ പാലങ്ങൾ എന്നിവ പദ്ധതിയുടെ ഭാഗമാണ്. സിസിടിവി ക്യാമറകൾ, ഇലക്ട്രോണിക് ഡിസ്‌പ്ലേ ബോർഡുകൾ, എമർജൻസി കോൾ ബോക്‌സുകൾ ഉൾപ്പെടെയുള്ള ആധുനിക ട്രാഫിക് മാനേജ്‌മെന്റ് സംവിധാനവും ഒരുക്കിയിട്ടുണ്ട്. ജംഗിൾ കൗഡിയ, കാംപിയർഗഞ്ച്, ആനന്ദ് നഗർ, മഹാരാജ്ഗഞ്ച്, നൗതൻവ എന്നിവിടങ്ങളിലൂടെ കടന്നുപോകുന്ന പാത ഈ വർഷം അവസാനത്തോടെ ഗതാഗതത്തിന് തുറന്നുകൊടുക്കുമെന്നാണ് ദേശീയപാതാ അതോറിറ്റിയുടെ പ്രതീക്ഷ. ഭാവിയിൽ ആറുവരിപ്പാതയായി വികസിപ്പിക്കാനും പശ്ചിമ ബംഗാളിലെ സിലിഗുരി വരെ നീട്ടാനും പദ്ധതിയുണ്ട്. പദ്ധതി പൂർത്തിയാകുന്നതോടെ ഇന്ത്യയും നേപ്പാളും തമ്മിലുള്ള റോഡ് ഗതാഗതം കൂടുതൽ സുഗമമാകുന്നതിനൊപ്പം കിഴക്കൻ ഉത്തർപ്രദേശിന്റെ വികസനത്തിനും ഇത് വേഗം കൂട്ടും.