ആണവ ഭീഷണികൾക്ക് വഴങ്ങില്ല, ഭീകരാക്രമണത്തിന് തിരിച്ചടി നൽകും

ന്യൂയോർക്ക്: ജമ്മു കശ്മീർ ഇന്ത്യയുടെ അവിഭാജ്യ ഘടകമാണെന്നും ആണവായുധ ഭീഷണികൾക്ക് ഇന്ത്യ വഴങ്ങില്ലെന്നും ഐക്യരാഷ്ട്രസഭയിൽ ഇന്ത്യ വ്യക്തമാക്കി. യുഎൻ വേദി ദുരുപയോഗം ചെയ്ത് പാകിസ്ഥാൻ തെറ്റായ പ്രചാരണം നടത്തുകയാണെന്ന് ആരോപിച്ച ഇന്ത്യ, ഭീകരാക്രമണമുണ്ടായാൽ ശക്തമായ തിരിച്ചടി നൽകുമെന്നും മുന്നറിയിപ്പ് നൽകി.ജമ്മു കശ്മീരിനെക്കുറിച്ച് പാകിസ്ഥാൻ ഉന്നയിച്ച അവകാശവാദങ്ങളെ തള്ളിക്കൊണ്ട് യുഎൻ പൊതുസഭയുടെ നാലാം കമ്മിറ്റിയിൽ എംപി മഹിമ കുമാരി മെവാർ ഇന്ത്യയുടെ നിലപാട് അവതരിപ്പിച്ചു. സ്വന്തം നിയന്ത്രണത്തിലുള്ള പ്രദേശങ്ങളിലെ മനുഷ്യാവകാശ ലംഘനങ്ങൾ പരിഹരിക്കുന്നതിനാണ് പാകിസ്ഥാൻ മുൻഗണന നൽകേണ്ടതെന്നും അവർ ആവശ്യപ്പെട്ടു. അതേസമയം, യുഎൻ പൊതുസഭയുടെ ഒന്നാം കമ്മിറ്റിയിൽ സംസാരിച്ച ഇന്ത്യൻ പ്രതിനിധി അൻമോൽ ഷേർ ബേദി, ഭീകരവാദത്തിന് പിന്തുണ നൽകുന്നവരെയും ആക്രമണങ്ങൾ ആസൂത്രണം ചെയ്യുന്നവരെയും വേർതിരിച്ചു കാണില്ലെന്ന് വ്യക്തമാക്കി. 2025-ൽ പഹൽഗാമിലുണ്ടായ ഭീകരാക്രമണത്തിൽ 26 സാധാരണക്കാർ കൊല്ലപ്പെട്ടതിനു പിന്നാലെ ഇന്ത്യ നടത്തിയ ഓപ്പറേഷൻ സിന്ദൂറും അദ്ദേഹം പരാമർശിച്ചു. സംഘർഷം വ്യാപിക്കുന്നത് ഒഴിവാക്കാൻ ലക്ഷ്യബോധത്തോടെയും നിയന്ത്രിതമായും സ്വയംപ്രതിരോധ നടപടികളാണ് ഇന്ത്യ സ്വീകരിച്ചതെന്നും ആണവായുധങ്ങൾ പതിവ് നയതന്ത്ര ഉപാധികളായി ഉപയോഗിക്കരുതെന്നും അദ്ദേഹം കൂട്ടിച്ചേർത്തു.