നെറ്റ്ഫ്ലിക്സ് ഇന്ത്യ സ്റ്റോറിടല്ലിംഗ് ഇനിഷ്യേറ്റീവ്; 100 സ്കോളർഷിപ്പുകളുമായി യുവ പ്രതിഭകൾക്ക് പുതിയ അവസരം

പ്രധാനമന്ത്രി നരേന്ദ്ര മോഡിയുമായി നടന്ന കൂടിക്കാഴ്ചയ്ക്ക് പിന്നാലെ ഇന്ത്യയിലെ യുവ പ്രതിഭകളെ ആഗോള വിനോദ വ്യവസായത്തിനായി സജ്ജമാക്കുന്ന ‘നെറ്റ്ഫ്ലിക്സ് ഇന്ത്യ സ്റ്റോറിടല്ലിംഗ് ഇനിഷ്യേറ്റീവ്’ പദ്ധതി നെറ്റ്ഫ്ലിക്സ് പ്രഖ്യാപിച്ചു. ആനിമേഷൻ, വിഷ്വൽ എഫക്ട്സ് (VFX), ഗെയിമിംഗ്, കോമിക്സ് (AVGC) എന്നീ അതിവേഗം വളരുന്ന മേഖലകളിൽ പ്രാവീണ്യമുള്ള തൊഴിൽസേനയെ സൃഷ്ടിക്കുക എന്നതാണ് പദ്ധതിയുടെ പ്രധാന ലക്ഷ്യം. ഇന്ത്യയുടെ സൃഷ്ടിപരമായ സമ്പദ്‌വ്യവസ്ഥയായ ‘ഓറഞ്ച് ഇക്കോണമി’യെ ശക്തിപ്പെടുത്തുന്നതിനും ‘വികസിത് ഭാരത് 2047’ ലക്ഷ്യങ്ങൾക്ക് പിന്തുണ നൽകുന്നതിനുമാണ് ഈ സംരംഭം രൂപകൽപ്പന ചെയ്തിരിക്കുന്നത്.പദ്ധതിയുടെ ആദ്യഘട്ടത്തിൽ ഇന്ത്യൻ ഇൻസ്റ്റിറ്റ്യൂട്ട് ഓഫ് ക്രിയേറ്റീവ് ടെക്നോളജിയുമായി (IICT) സഹകരിച്ച് വ്യവസായ ആവശ്യങ്ങൾക്കനുസരിച്ചുള്ള പ്രത്യേക കോഴ്സുകളും പരിശീലന പരിപാടികളും നടപ്പാക്കും. ക്യാരക്ടർ ആനിമേഷൻ, ഗെയിമിംഗ് മാനേജ്മെന്റ്, കോമിക്സ് ആർട്ട് തുടങ്ങിയ മേഖലകളിൽ പഠനം നടത്തുന്ന വിദ്യാർഥികൾക്കായി 100 സ്കോളർഷിപ്പുകളും പ്രഖ്യാപിച്ചിട്ടുണ്ട്. രണ്ടാംഘട്ടത്തിൽ നാഷണൽ ഫിലിം ഡെവലപ്‌മെന്റ് കോർപ്പറേഷനുമായി (NFDC) ചേർന്ന് കാഴ്ച-കേൾവി വൈകല്യമുള്ളവർക്ക് സിനിമകളും സീരീസുകളും കൂടുതൽ സുഗമമാക്കുന്നതിനായി വോയ്സ് ആർട്ടിസ്റ്റുകളെയും ഓഡിയോ ഡിസ്ക്രിപ്ഷൻ എഴുത്തുകാരെയും പരിശീലിപ്പിക്കും. ഇന്ത്യയെ ആഗോള വിനോദ നിർമ്മാണത്തിന്റെയും ക്രിയേറ്റീവ് ഇന്നൊവേഷന്റെയും കേന്ദ്രമായി വളർത്താനുള്ള ദീർഘകാല നിക്ഷേപമായാണ് നെറ്റ്ഫ്ലിക്സ് ഈ പദ്ധതിയെ അവതരിപ്പിക്കുന്നത്.