ജപ്പാന്റെ ‘ഹ്യൂമൻ ഫ്രിഡ്ജ്’ വൈറൽ; ചൂടിൽ നിന്ന് മിനിറ്റുകൾക്കകം ആശ്വാസം

ജപ്പാനിലെ പുതുമയാർന്ന സാങ്കേതിക ആശയങ്ങളുടെ പട്ടികയിലേക്ക് മറ്റൊന്ന് കൂടി ചേർന്നിരിക്കുകയാണ്. കടുത്ത വേനൽച്ചൂടിൽ നിന്ന് തൊഴിലാളികൾക്ക് വേഗത്തിൽ ആശ്വാസം നൽകാൻ ‘ഡൊ ഹീമോൺ ബോക്സ്’ (Do Hiemon Box) എന്ന പേരിൽ ‘ഹ്യൂമൻ ഫ്രിഡ്ജ്’ എന്ന വ്യക്തിഗത കൂളിംഗ് ബൂത്ത് അവതരിപ്പിച്ചിരിക്കുകയാണ്. പ്രമുഖ വ്യവസായിയായ ഹർഷ് ഗോയങ്ക എക്സ് പ്ലാറ്റ്‌ഫോമിൽ പങ്കുവെച്ച വീഡിയോയിലൂടെയാണ് ഈ സംവിധാനം ശ്രദ്ധ നേടിയത്. 15 ഡിഗ്രി സെൽഷ്യസ് താപനില നിലനിർത്തുന്ന ഈ വാക്ക്-ഇൻ ബൂത്തിൽ 5 ഡിഗ്രി സെൽഷ്യസ് തണുത്ത വായു നേരിട്ട് തലയിലും കഴുത്തിലും ശരീരത്തിലും എത്തിച്ച് ഏതാനും മിനിറ്റുകൾക്കുള്ളിൽ ശരീര താപനില കുറയ്ക്കാൻ സാധിക്കും. ഫാക്ടറികളിലും നിർമ്മാണ മേഖലകളിലും ജോലി ചെയ്യുന്നവരെ ലക്ഷ്യമിട്ടാണ് ഈ വാട്ടർപ്രൂഫ് സംവിധാനം രൂപകൽപ്പന ചെയ്തിരിക്കുന്നത്. ഇന്ത്യ പോലുള്ള ചൂടേറിയ രാജ്യങ്ങളിലും ഇത്തരം ബൂത്തുകൾ സ്ഥാപിക്കണമെന്ന ആവശ്യം ഉയരുന്നുണ്ടെങ്കിലും, ചെലവ്, പ്രായോഗികത, ജനസംഖ്യാ സാന്ദ്രത തുടങ്ങിയ വിഷയങ്ങൾ ചർച്ചയാകുകയാണ്. അതേസമയം, കൂടുതൽ മരങ്ങൾ നട്ടുപിടിപ്പിക്കുന്നതുപോലുള്ള ദീർഘകാല പരിസ്ഥിതി സൗഹൃദ പരിഹാരങ്ങളാണ് കൂടുതൽ ഫലപ്രദമെന്ന് മറ്റൊരു വിഭാഗം അഭിപ്രായപ്പെടുന്നു. എന്തായാലും ജപ്പാന്റെ ഈ ‘ഹ്യൂമൻ ഫ്രിഡ്ജ്’ ആശയം ഇപ്പോൾ സമൂഹമാധ്യമങ്ങളിൽ വലിയ ചർച്ചയ്ക്കും കൗതുകത്തിനും വഴിവെച്ചിരിക്കുകയാണ്.