ഇന്ത്യയെ ആഗോള കെമിക്കൽ ഹബ്ബാക്കാൻ BHAVYA Rasayan പദ്ധതി

രാജ്യത്തെ രാസവസ്തു നിർമ്മാണ മേഖലയെ ആഗോള നിലവാരത്തിലേക്ക് ഉയർത്തുകയും വ്യാവസായിക അടിസ്ഥാന സൗകര്യങ്ങൾ ശക്തിപ്പെടുത്തുകയും ചെയ്യുന്നതിനായി കേന്ദ്ര സർക്കാർ BHAVYA Rasayan Scheme പ്രഖ്യാപിച്ചു. 2026-27 മുതൽ 2030-31 വരെയുള്ള അഞ്ച് വർഷ കാലയളവിൽ നടപ്പാക്കുന്ന പദ്ധതിക്ക് മൊത്തം 3,000 കോടി രൂപയുടെ വകയിരുത്തലാണ് നൽകിയിരിക്കുന്നത്. പദ്ധതിയുടെ ഭാഗമായി രാജ്യത്തിന്റെ വിവിധ ഭാഗങ്ങളിലായി മൂന്ന് അത്യാധുനിക കെമിക്കൽ പാർക്കുകൾ സ്ഥാപിക്കും. ഓരോ പാർക്കിനും കേന്ദ്ര സർക്കാർ പരമാവധി 1,000 കോടി രൂപ വരെ സാമ്പത്തിക സഹായം നൽകും. അതേസമയം, ബന്ധപ്പെട്ട സംസ്ഥാന സർക്കാർ കുറഞ്ഞത് 500 കോടി രൂപയെങ്കിലും സംഭാവന ചെയ്യണം. പൊതുവായ അടിസ്ഥാന സൗകര്യങ്ങൾ, യൂട്ടിലിറ്റികൾ, ലജിസ്റ്റിക് സംവിധാനങ്ങൾ എന്നിവ പങ്കുവെച്ച് ഉപയോഗിക്കുന്നതിലൂടെ കമ്പനികളുടെ പ്രവർത്തനച്ചെലവ് 20 മുതൽ 30 ശതമാനം വരെ കുറയ്ക്കാനാകുമെന്നാണ് വിലയിരുത്തൽ. ദ്രാവകവും വാതക രൂപത്തിലുള്ളതുമായ മാലിന്യങ്ങളുടെ ശാസ്ത്രീയ സംസ്കരണം, ഉയർന്ന സുരക്ഷാ മാനദണ്ഡങ്ങൾ, പരിസ്ഥിതി സംരക്ഷണം എന്നിവയ്ക്കും പദ്ധതിയിൽ പ്രത്യേക പ്രാധാന്യം നൽകിയിട്ടുണ്ട്. ആഭ്യന്തര ഉൽപ്പാദനം വർധിപ്പിക്കാനും നിക്ഷേപങ്ങൾ ആകർഷിക്കാനും തൊഴിൽ അവസരങ്ങൾ സൃഷ്ടിക്കാനും ഇന്ത്യയെ ആഗോള രാസവസ്തു നിർമ്മാണ കേന്ദ്രമാക്കാനുമാണ് പദ്ധതിയുടെ പ്രധാന ലക്ഷ്യം.