മുംബൈയിൽ മുഹറം ഘോഷയാത്രയ്ക്കിടെ വിഷ​ഗുളികകൾ വിതരണംചെയ്തയാൾ പിടിയിൽ

മുംബയിലെ ബൈക്കുളയിൽ മുഹറം ഘോഷയാത്രയ്ക്കിടെ വിഷവസ്തുക്കൾ കലർത്തിയ ക്യാപ്സൂളുകൾ വിതരണം ചെയ്തെന്നാരോപിച്ച് ഫയ്യാസ് പ്രേംജി എന്നയാളെ പൊലീസ് അറസ്റ്റ് ചെയ്തു. വേദനസംഹാരിയെന്നും പ്രതിരോധശേഷി വർധിപ്പിക്കുന്ന മരുന്നാണെന്നും പറഞ്ഞാണ് ഇയാൾ ഗുളികകൾ വിതരണം ചെയ്തത്. മൂന്ന് വനിതാ വൊളന്റിയർമാരുടെ ജാഗ്രതയെ തുടർന്ന് പൊലീസ് ഇടപെട്ട് പ്രതിയെ പിടികൂടി. ഇയാളിൽ നിന്ന് 14,900 വിഷക്യാപ്സൂളുകൾ പിടിച്ചെടുത്തു. ഗുളികകൾ കഴിച്ച 11 പേർക്ക് ദേഹാസ്വാസ്ഥ്യം അനുഭവപ്പെട്ടതിനെ തുടർന്ന് ആശുപത്രിയിൽ പ്രവേശിപ്പിച്ചെങ്കിലും ഒരാളുടെ നില മാത്രമാണ് ഗുരുതരമായത്. സിങ്ക് ഫോസ്ഫൈഡ് ഉൾപ്പെടെയുള്ള വിഷവസ്തുക്കൾ ക്യാപ്സൂളുകളിൽ നിറച്ചിരുന്നുവെന്നാണ് പൊലീസ് പറയുന്നത്. ഏകദേശം 15,000 പേരെ ലക്ഷ്യമിട്ടിരുന്നുവെന്ന മൊഴിയും 30,000 ക്യാപ്സൂളുകളും 50 കിലോഗ്രാം രാസവസ്തുക്കളും ഓർഡർ ചെയ്തിരുന്നുവെന്ന വിവരവും അന്വേഷണത്തിൽ പുറത്തുവന്നു. പ്രതിയുടെ വിദേശയാത്രകളും സംഭവത്തിന് പിന്നിൽ തീവ്രവാദബന്ധമുണ്ടോയെന്നും പൊലീസ് വിശദമായി അന്വേഷിച്ചുവരികയാണ്.