20,000 കിമീ അകലത്ത് നിന്നെത്തുന്ന സഹായം; എൽപിജി ക്ഷാമത്തിൽ ഇന്ത്യക്ക് ആശ്വാസം

പശ്ചിമേഷ്യയിലെ യുദ്ധത്തെ തുടർന്ന് ഹോർമുസ് കടലിടുക്ക് അടച്ചതോടെ ഇന്ത്യയിൽ ദ്രവീകൃത പെട്രോളിയം വാതക (എൽപിജി) ക്ഷാമം രൂക്ഷമായി. ഇന്ത്യയുടെ എൽപിജി ഇറക്കുമതിയുടെ ഏകദേശം 60 ശതമാനവും ഈ നിർണായക കടൽപാതയിലൂടെ ആയതിനാൽ വിതരണ ശൃംഖല ഗുരുതരമായി ബാധിച്ചു. ഈ സാഹചര്യത്തിൽ, ഏകദേശം 20,000 കിലോമീറ്റർ അകലെയുള്ള തെക്കേ അമേരിക്കൻ രാജ്യമായ അർജന്റീന ഇന്ത്യയ്ക്ക് സഹായഹസ്തം നീട്ടി. 2026-ലെ ആദ്യ പാദത്തിൽ മാത്രം 50,000 ടൺ എൽപിജിയാണ് അർജന്റീന ഇന്ത്യയിലേക്ക് കയറ്റുമതി ചെയ്തത്, 2025-ലെ മൊത്തം കയറ്റുമതിയുടെ ഇരട്ടിയിലധികം. സംഘർഷം രൂക്ഷമാകുന്നതിന് മുമ്പ് തന്നെ ബഹിയ ബ്ലാങ്ക തുറമുഖത്ത് നിന്ന് 39,000 ടൺ എത്തുകയും, മാർച്ച് 5ന് 11,000 ടൺ കൂടി അയയ്ക്കുകയും ചെയ്തു. 2024 വരെ ഇന്ത്യയ്ക്ക് എൽപിജി നൽകാത്തിരുന്ന അർജന്റീനയുടെ ഈ നീക്കം ഇരു രാജ്യങ്ങളുടെയും ഊർജ്ജ സഹകരണത്തിൽ വേഗത്തിലുള്ള വളർച്ചയെ സൂചിപ്പിക്കുന്നു. ഇന്ത്യയിലെ അർജന്റീന അംബാസഡർ മരിയാനോ അഗസ്റ്റിൻ കൂസിനോ, ഇന്ത്യയുടെ ഊർജ്ജ സുരക്ഷയിൽ കൂടുതൽ പങ്കാളിത്തത്തിനുള്ള സന്നദ്ധതയും, ഊർജ്ജ സ്രോതസ്സുകൾ വൈവിധ്യവത്കരിക്കുന്ന ഇന്ത്യയുടെ തന്ത്രം ശരിയായ ദിശയിലാണെന്നും വ്യക്തമാക്കി. നിലവിലെ ഭൗമരാഷ്ട്രീയ സാഹചര്യങ്ങൾ ഇരു രാജ്യങ്ങളും തമ്മിലുള്ള സഹകരണം കൂടുതൽ ശക്തിപ്പെടുത്തുമെന്ന് അദ്ദേഹം കൂട്ടിച്ചേർത്തു.