10, 20 രൂപ പോളിമർ നോട്ടുകൾക്ക് സാധ്യത; പഠനം നടത്തി RBI

10, 20 രൂപയുടെ പോളിമർ (പ്ലാസ്റ്റിക്) നോട്ടുകൾ പുറത്തിറക്കാനുള്ള സാധ്യത ഇന്ത്യ പരിശോധിക്കുന്നതായി റിപ്പോർട്ടുകൾ സൂചിപ്പിക്കുന്നു. സാധാരണ പേപ്പർ നോട്ടുകളെ അപേക്ഷിച്ച് 2.5 മുതൽ 4 മടങ്ങ് വരെ കൂടുതൽ കാലം ഈടുനിൽക്കുന്ന പോളിമർ നോട്ടുകൾ വാട്ടർപ്രൂഫ് ആയതിനാൽ കഴുകി വൃത്തിയാക്കാനും സാധിക്കും. കൂടാതെ വ്യാജനോട്ടുകൾ തടയാൻ സഹായിക്കുന്ന അത്യാധുനിക സുരക്ഷാ സംവിധാനങ്ങളും ഇവയിൽ ഉൾപ്പെടുത്തിയിട്ടുണ്ട്. രാജ്യത്തെ വിവിധ കാലാവസ്ഥാ സാഹചര്യങ്ങളിൽ ഈ നോട്ടുകളുടെ ഗുണനിലവാരം പരീക്ഷിക്കുന്ന ഘട്ടത്തിലാണിപ്പോൾ പദ്ധതി. നിലവിലുള്ള കറൻസി നോട്ടുകൾക്കൊപ്പം തന്നെ ഇവയും പ്രചാരത്തിലുണ്ടാകുമെന്നാണ് സൂചന. ഓസ്‌ട്രേലിയ, ബ്രിട്ടൻ, കാനഡ, സിംഗപ്പൂർ എന്നിവ ഉൾപ്പെടെ 30-ലധികം രാജ്യങ്ങൾ ഇതിനകം പോളിമർ നോട്ടുകൾ ഉപയോഗിക്കുന്നുണ്ട്.