യമുനോത്രി, ഗംഗോത്രി, കേദാർനാഥ്, ബദരീനാഥ് എന്നിവിടങ്ങളിലേയ്ക്ക് നടത്തുന്ന ഒരു പര്യടനമാണ് ചാർ ധാം യാത്ര.

ഉത്തരാഖണ്ഡിലെ പ്രശസ്തമായ ചാർ ധാം യാത്ര ഏപ്രിൽ 30ന് ആരംഭിക്കും. ഗംഗോത്രി, യമുനോത്രി എന്നിവിടങ്ങളിലേക്കുള്ള പ്രവേശന കവാടങ്ങൾ തുറക്കുന്നതോടെയാണ് യാത്രയ്ക്ക് തുടക്കമാകുക. ബദരീനാഥിന്റെ വാതിലുകൾ മെയ് 4 ന് രാവിലെ 6 മണിക്ക് തുറക്കും. കേദാർനാഥ് ധാമിന്റെ വാതിലുകൾ തുറക്കുന്ന തീയതി മഹാശിവരാത്രി ദിനമായ ഫെബ്രുവരി 26 ന് പ്രഖ്യാപിക്കും. ചാർ ധാം യാത്രയ്ക്ക് ഓൺലൈനായും ഓഫ്‌ലൈനായും രജിസ്റ്റർ ചെയ്യാം. രജിസ്ട്രേഷൻ ഉടൻ ആരംഭിക്കും. 60% രജിസ്ട്രേഷനുകൾ ഓൺലൈനായും 40% ഓഫ്‌ലൈനായും നടത്തുമെന്നാണ് റിപ്പോർട്ട്. ആദ്യത്തെ 15 ദിവസത്തേക്ക്, ഓഫ്‌ലൈൻ രജിസ്ട്രേഷൻ പ്രക്രിയ 24 മണിക്കൂറും ലഭ്യമാകും. ഇതിന് ശേഷം, ആവശ്യാനുസരണം സമയത്തിൽ മാറ്റം വരുത്തും. സ്ഥിതി നിയന്ത്രണവിധേയമായി തുടരുകയാണെങ്കിൽ, രജിസ്ട്രേഷൻ സമയം രാവിലെ 8 മുതൽ രാത്രി 11 വരെയാക്കി മാറ്റിയേക്കാം. നടപടിക്രമങ്ങൾ എളുപ്പമാക്കുന്നതിനായി ഹരിദ്വാറിലും ഋഷികേശിലും 20 രജിസ്ട്രേഷൻ സ്റ്റേഷനുകളും വികാസ്നഗറിൽ 15 കൗണ്ടറുകളും സ്ഥാപിക്കും. 2025 മാർച്ച് 1 മുതൽ ആരംഭിക്കുന്ന registrationandtouristcare.uk.gov.in എന്ന ഉത്തരാഖണ്ഡ് സർക്കാരിന്റെ ഔദ്യോഗിക വെബ്‌സൈറ്റ് വഴി തീ‍‌ർത്ഥാടകർക്ക് രജിസ്റ്റർ ചെയ്യാം.