ഇന്ത്യയും യുഎസും വ്യാപാര കരാർ എത്രയും വേഗം അവസാനിപ്പിക്കാൻ ശ്രമിക്കുന്നു: സർക്കാർ

യുഎസ് വ്യാപാര പ്രതിനിധിയുമായുള്ള (USTR) തുടർച്ചയായ ചർച്ചകളുടെ ഫലമായി ഇന്ത്യൻ ഉൽപ്പന്നങ്ങൾക്ക് നിർദേശിച്ചിരുന്ന അധിക ഇറക്കുമതി തീരുവ 12.5 ശതമാനത്തിൽ നിന്ന് 10 ശതമാനമായി കുറയ്ക്കാൻ കഴിഞ്ഞതായി കേന്ദ്ര വാണിജ്യ മന്ത്രാലയം അറിയിച്ചു. 1974-ലെ യുഎസ് വ്യാപാര നിയമത്തിലെ സെക്ഷൻ 301 പ്രകാരമാണ് ഈ നടപടി സ്വീകരിച്ചിരിക്കുന്നത്. വിശദമായ രേഖാമൂലമുള്ള നിവേദനങ്ങൾ, നേരിട്ടുള്ള ചർച്ചകൾ, പൊതുഹിയറിംഗുകളിലെ പങ്കാളിത്തം എന്നിവയിലൂടെ ഇന്ത്യയുടെ ആശങ്കകൾ യുഎസ് അധികൃതരെ അറിയിച്ചതായും മന്ത്രാലയം വ്യക്തമാക്കി. ഇതോടെ അധിക താരിഫ് ചുമത്തപ്പെട്ട രാജ്യങ്ങളിൽ ഇന്ത്യയ്ക്ക് താരതമ്യേന കുറഞ്ഞ നിരക്കാണ് ബാധകമായിരിക്കുന്നത്.അതേസമയം, ഇന്ത്യയും അമേരിക്കയും തമ്മിലുള്ള ഉഭയകക്ഷി വ്യാപാര കരാർ (BTA) എത്രയും വേഗം പൂർത്തിയാക്കാൻ ഇരു രാജ്യങ്ങളും ശ്രമം തുടരുകയാണെന്നും മന്ത്രാലയം അറിയിച്ചു. ജനറിക് മരുന്നുകൾ, സ്മാർട്ട്ഫോണുകൾ, മറ്റ് ചില നിർദിഷ്ട ഉൽപ്പന്നങ്ങൾ എന്നിവ ഉൾപ്പെടെയുള്ള ഇന്ത്യയുടെ പ്രധാന കയറ്റുമതികൾക്ക് ഈ അധിക 10 ശതമാനം തീരുവ ബാധകമല്ല. കൂടാതെ, സ്റ്റീൽ, അലുമിനിയം, ഓട്ടോ പാർട്സ് തുടങ്ങിയ സെക്ഷൻ 232 നടപടികൾക്ക് കീഴിലുള്ള ഉൽപ്പന്നങ്ങളെയും പുതിയ തീരുവ ബാധിക്കില്ല. ഇതോടെ പ്രധാന കയറ്റുമതി മേഖലകളിൽ ഇന്ത്യയുടെ മത്സരക്ഷമതയ്ക്ക് വലിയ തിരിച്ചടിയുണ്ടാകില്ലെന്നാണ് കേന്ദ്രത്തിന്റെ വിലയിരുത്തൽ.