സെമികണ്ടക്ടർ ഹബ്ബായി ഇന്ത്യ; നീക്കങ്ങൾ വേഗത്തിലാക്കി കേന്ദ്രം

ഇന്ത്യയെ ആഗോള സെമികണ്ടക്ടർ നിർമ്മാണ കേന്ദ്രമാക്കി മാറ്റുന്നതിനുള്ള ശ്രമങ്ങൾ കേന്ദ്ര സർക്കാർ വേഗത്തിലാക്കുകയാണ്. നിലവിൽ സോഫ്റ്റ്‌വെയർ വികസനത്തിലും ഐടി സേവനങ്ങളിലും ലോകനിരയിൽ മുന്നിലുള്ള ഇന്ത്യ, സെമികണ്ടക്ടറുകളുടെ 90 ശതമാനത്തിലധികവും ഇറക്കുമതിയെ ആശ്രയിക്കുന്ന സാഹചര്യമാണ് നിലനിൽക്കുന്നത്. മൊബൈൽ ഫോണുകൾ, വാഹനങ്ങൾ, പ്രതിരോധ ഉപകരണങ്ങൾ, ആർട്ടിഫിഷ്യൽ ഇന്റലിജൻസ് സംവിധാനങ്ങൾ തുടങ്ങി ആധുനിക സാങ്കേതിക വിദ്യയുടെ എല്ലാ മേഖലകളുടെയും അടിത്തറയായ ചിപ്പുകളുടെ ആഭ്യന്തര ഉൽപ്പാദനം വർധിപ്പിക്കേണ്ടത് ദേശീയ മുൻഗണനയായി മാറിയിരിക്കുകയാണ്.ഇതിനായാണ് കേന്ദ്ര സർക്കാർ 76,000 കോടി രൂപയുടെ ഇന്ത്യ സെമികണ്ടക്ടർ മിഷൻ (ISM) ആരംഭിച്ചത്. ഈ പദ്ധതിയുടെ ഭാഗമായി സെമികണ്ടക്ടർ ഫാബ്രിക്കേഷൻ യൂണിറ്റുകൾ (Fabs), ചിപ്പ് പാക്കേജിംഗ്, ടെസ്റ്റിംഗ്, അസംബ്ലി യൂണിറ്റുകൾ എന്നിവ സ്ഥാപിക്കാൻ സാമ്പത്തിക പ്രോത്സാഹനങ്ങളും അടിസ്ഥാന സൗകര്യങ്ങളും ഒരുക്കുന്നു. ഗുജറാത്ത്, അസം, ഉത്തർപ്രദേശ്, തമിഴ്നാട് തുടങ്ങിയ സംസ്ഥാനങ്ങളിൽ ഇതിനകം തന്നെ നിരവധി സെമികണ്ടക്ടർ-ഇലക്ട്രോണിക്സ് പദ്ധതികൾ പ്രഖ്യാപിക്കപ്പെട്ടിട്ടുണ്ട്. രാജ്യത്തെ ചിപ്പ് ഡിസൈൻ മേഖലയിൽ ഇന്ത്യയുടെ ശക്തി പ്രയോജനപ്പെടുത്തി, ഡിസൈൻ മുതൽ നിർമ്മാണം വരെയുള്ള സമ്പൂർണ സെമികണ്ടക്ടർ ഇക്കോസിസ്റ്റം സൃഷ്ടിക്കുകയാണ് ലക്ഷ്യം.സർക്കാരിന്റെ കണക്കുകൾ പ്രകാരം, ഇന്ത്യയിലെ സെമികണ്ടക്ടർ വിപണി 2030-ഓടെ 120 ബില്യൺ ഡോളറിലേക്കും 2035-ഓടെ 350 ബില്യൺ ഡോളറിലേക്കും വളരാൻ സാധ്യതയുണ്ട്. ഈ വളർച്ചയെ പിന്തുണയ്ക്കുന്നതിനായി ആഗോള കമ്പനികളെ ഇന്ത്യയിലേക്ക് ആകർഷിക്കാനും ആഭ്യന്തര കമ്പനികൾക്ക് കൂടുതൽ പിന്തുണ നൽകാനും ശ്രമങ്ങൾ തുടരുകയാണ്. പദ്ധതികൾ വിജയകരമായി നടപ്പായാൽ 2035-ഓടെ രാജ്യത്തിന്റെ സെമികണ്ടക്ടർ ആവശ്യത്തിന്റെ ഏകദേശം 60 ശതമാനം ആഭ്യന്തരമായി ഉൽപ്പാദിപ്പിക്കാനും 20 ലക്ഷത്തോളം നേരിട്ടും പരോക്ഷമായും തൊഴിലവസരങ്ങൾ സൃഷ്ടിക്കാനുമാകുമെന്നാണ് പ്രതീക്ഷ. ഇതിലൂടെ ഇന്ത്യ ഇറക്കുമതി ആശ്രിതത്വം കുറയ്ക്കുന്നതോടൊപ്പം ആഗോള സാങ്കേതിക വിതരണ ശൃംഖലയിൽ നിർണായക സ്ഥാനവും സ്വന്തമാക്കാൻ ലക്ഷ്യമിടുന്നു.