ഇന്ത്യയുടെ വിശ്വസ്ത വിക്ഷേപണ വാഹനമായ പോളാർ സാറ്റലൈറ്റ് ലോഞ്ച് വെഹിക്കിളിനെ (PSLV) വീണ്ടും സജീവമാക്കുന്നതിന്റെ ഭാഗമായി മൂന്നാം ഘട്ടത്തിന്റെ (PS3) ഗ്രൗണ്ട് സ്റ്റാറ്റിക് പരീക്ഷണം ഐഎസ്ആർഒ വിജയകരമായി പൂർത്തിയാക്കി. 2026 നവംബർ 12 വ്യാഴാഴ്ച ശ്രീഹരിക്കോട്ടയിലെ സതീഷ് ധവാൻ ബഹിരാകാശ കേന്ദ്രത്തിലുള്ള സ്റ്റാറ്റിക് ടെസ്റ്റ് ഫെസിലിറ്റിയിലാണ് പരീക്ഷണം നടത്തിയത്.
PSLV-C61/EOS-09, PSLV-C62/EOS-N1 ദൗത്യങ്ങൾക്കിടെ മൂന്നാം ഘട്ടത്തിൽ അസ്വാഭാവികതകൾ കണ്ടെത്തിയതിനെത്തുടർന്നാണ് ഘട്ടത്തിന്റെ ഘടന സമഗ്രമായി പുനഃപരിശോധിച്ചത്. ഡിസൈൻ മാർജിനുകൾ, അസംസ്‌കൃത വസ്തുക്കളുടെ ഗുണനിലവാരം, അസംബ്ലി നടപടിക്രമങ്ങൾ, ഗുണനിലവാര പരിശോധനകൾ എന്നിവ വിലയിരുത്തിയ ശേഷമാണ് പുതിയ പരീക്ഷണം നടത്തിയത്.
PSLV വിക്ഷേപണങ്ങളുടെ വിശ്വാസ്യതയും സുരക്ഷയും ഉറപ്പാക്കുന്നതിനുള്ള നിർണായക ചുവടുവയ്പ്പായാണ് ഈ പരീക്ഷണം വിലയിരുത്തപ്പെടുന്നത്.
